1 сәуір – Халықаралық құстар күні, бұл күн құстарды қорғау және олардың экожүйедегі рөлін насихаттауға бағытталған. Құстар – жануарлар әлемінің ерекше әрі маңызды өкілдері. Осы мереке аясында «Ақжайық» мемлекеттік табиғи резерваты табиғат пен орнитологияға қызығушылық танытатын жастар мен студенттер үшін «Көктемгі құстардың көші-қон кезіндегі есеп-санағын жүргізу» тақырыбында шеберлік сағатын өткізді.
Шараға Х.Досмұхамедов атындағы Атырау университетінің студенттері қатысты. Оқу процесінің теориялық бөлігі резерват кеңсесінде өтсе, тәжірибелік кезең Рыбоходный каналы бойында жалғасты.
Шеберлік сағатының негізгі мақсаты – құстар санағының ғылыми маңыздылығын түсіндіру, олардың табиғаттағы рөлін көрсету және орнитология саласының жас мамандарына тәжірибелік білім беру. «Парктер шеруі–2025» аясында ұйымдастырылған бұл іс-шара болашақ орнитологтардың кәсіби дағдыларын жетілдіруге және құстарды бақылау мен қорғаудың маңызын арттыруға ықпал етті.
