“Ақжайық” мемлекеттік табиғи резерватының мемлекеттік инспекторларының түнгі қызметтік жұмыстары барысында Рыбоходный учаскесінің 29-кварталында барылдауық үйректің (кряква) (Anas platyrhynchos) аналығы кездесті. Құстың мінез-құлқы мамандардың назарын бірден аударды: ол адамға жақын қашықтыққа дейін жуықтап, бірден ұшып кетуге асықпады.
Мұндай мінез-құлық барылдауық үйрек аналығының табиғи аналық инстинктімен түсіндіріледі. Ұя салу кезеңінде аналық қауіп төнгенін сезсе, ықтимал қауіптің назарын өзіне аударып, оны балапандары болуы мүмкін аумақтан алыстатуға тырысады. Бұл – ұрпағын қорғауға бағытталған табиғи қорғаныс тәсілдерінің бірі.
Барылдауық үйрек – Қазақстандағы ең кең таралған су құстарының бірі. Ол өзен-көлдерде, қамысты-батпақты алқаптарда және жайылма суларда мекендейді. «Ақжайық» мемлекеттік табиғи резерватының сулы-батпақты экожүйелері бұл түрдің тіршілік етуіне, қоректенуіне және көбеюіне қолайлы жағдай жасайды. 2025 жылы табиғи резерваттың аумағында барлығы 9009 барылдауық үйрек тіркелген.
Табиғатта жиі кездесе бермейтін осындай сәттер жабайы жануарлардың мінез-құлқын тереңірек тануға мүмкіндік береді. Аналық үйректің өз ұрпағын қорғауға бағытталған әрекеті – табиғаттың ең әсерлі құбылыстарының бірі. Осындай бақылаулар биоалуантүрлілікті зерттеуге, табиғи экожүйелердің жай-күйін бағалауға және табиғатты қорғау жұмыстарының маңызын арттыруға септігін тигізеді.
